Jichhuruw aka uraqpachat sipans jach’a apthapi uñacht’ayapxi

Apthapi ukax  aymar sarawin phuqhayatawa. Ukanx kunayman manq’a phayt’atanakaw apnuqata. Ukampis aka amtawix ayllunakanx phuqhataw ukhaman taqinis mä wawar tukt’asin qamart’añataki ukatsti quqt’asiñataki. Uka tuqinx kawkir achunakatix achuqayasin phayt’ata utji ukanakaw quqt’asiñatakix apnuqataxa. Ukampisa ayllunakanx yatitaw  uka apthapitx janiw kuna manq’añanakas jilt’ayañakiti ukhamaspatix  ayllu tuqin irpirinakax taqiniruw  jaljawayxi. Ukatx aymar sarawinx apthapi tuqix yatichawi, yatiqawi, aruskipawi, yäqawinakas kunkañchayatarakiwa.

Jichhurux aka Chukiagu markanx aka uraqpachans jan kunapachas uñjata  wali jach’a apthapünwa uñacht’ayapxi. Ukax Plaza San Francisco tuqita  Prado ukakamaw maykipi. Ukanx Departamento de La Paz tuqin suyunakan achuyatanakaw uñacht’ayataxa. Asociación Boliviana de Chefs manq’a phayirinakan irpiripa, Pedro Cadena, sawayiwa aka amtampix  amuyataw phuqhasiñapa ukhaman jiwasan sarawisax ch’amanchatañapataki.