SEGURIDAD
Felipa Huanca: Jisk’achaña, jiwayañanak jan utjxañapatakix saräwinakas yatiyapxañasawa
Publicado el 11/11/2014

Aka qhipa maranakanx warminakar jisk’achaña, nanqhachaña, jiwayañas añchapuniw utjawayxi.

Akürunakanx walipuniw ist’asi warminakar jisk’achañ-tuqita, ukjamaraki jiwayaña, kunati Nº 348 kamachix janiw phuqhayataxiti, yäqataxisa, ukampis uka kamachix warminakar jisk’achañax jan utjxañapatak utt’ayatawa. Aka marax Taypi sata phaxsinakiw Reglamentación ukas jaysasiwayxi ukjamaraki Impuesto Directo a los Hidrocarburos uksat qullqix irtatäñapa ukas janiw phuqasiwaykiti.

Rodolfo Calle, Comisión de Derechos Humanos Cámara de Diputados uksan jilïripax yatiyawayiwa, mä kamachiw utji, uksti jueces, fiscales jupanakaw phuqayapxañapa, mä warmirutix jiwayapxchi ukjaxa kimsa tunk mara mutuyatapxañapawa jan kawksarus mistuyasa, ukampis nänakax Consejo de la Magistratura uksaruw mayiwayapxä, jichhakamax kawqhanipnis warminakax jiwayat utji, juesanakax qhawqs uka juchanak t’aqawayapxi, taqi ukanakat yatxatañataki, sasinwa jilatax qhanañcht’awayi.

Maysatxa, Felipa Huanca, Federación Sindical de Mujeres Campesinas Indígenas Originarias de La Paz "Bartolina Sisa" (FSMCIOLP-BS) uksan Tayka Mallkupax yatiyarakiwa, waljkutiw warmjamax arsuwayapxta, kamachinakax radio, televisión uksa yatiyatäñapa ukjamaraki qillqatanakax utjañapa markachirin yatipxañapataki, ukjamarus jiwasan saräwinakas yatiyapxañapa, kunatix nayra maranakax janiw mä warmir jiwayañax utjkänti, jichhax qullqi utjatapatxa ukampix jasakwa justicia alapxi, ukanakaw mayjt’ayañ wakisi.