NACIONAL - MARKASAT YATIYÄWINAKA
Thuqhurinaka: Bolivia markan thuqhunakapx janiw Perú markax katuntaskaspati
Publicado el 11/11/2014

Sapa mara thuqt’iri jilat kullakanakax walipuniw Bolivia markan may maya thuqhunakax utjki ukanak arxatañatakix Chukiyawu markan Unesco punkun unxtasiwyapxi.

Niya 40 jila thuqt’ir jilat kullakanakaw Chukiyawu markanx 11 uru lapaka phaxsin Organización de las Naciones Unidas para la Educación, la Ciencia y la Cultura (Unesco) uka uta punkun tamacht’asisin unxtasiwyapxi ukjamat Bolivia markan may maya thuqt’awinakax utjki ukanak arxatañataki, kunati jichhürunakanx Perú markankirinakaw Virgen de Candelaria phunchhawin jach’anchayasin jupanakankkaspas ukjam katuntasiñ munxapxi.

Napoleón Gómez, Organización Boliviana de Defensa del Folklore (OBDEFO) irpirix wali qhuru arumpiw arsuwayi, jiwasan thuqt’äwinakasax "Obra Maestra del Patrimonio Oral e Inmaterial de la Humanidad" uñt’atawa, janiw khitis jasaki katuntasiñx amtkaspati, ukampisa Perú markax Bolivia markan moreno, diablada, t’inkhu yaqha thuqhunakx jasakiw katuntasiñ muni, jupanakankkaspas ukjama Virgen de Candelaria phunchhawin jach’anchayapxi, ukax janiw satawa, sasinwa mä qillqattuqi Unesco uksaturux Zulma Yugar, exministra de Culturas jupamp chikt’atax luqtawayapxi.

Ukampis Perú markankirinakax Bolivia markan phust’äwinakapa, isinakapa katuntasiñ amtapxi, uk yatisinx khitinakati familia folklorista ukjamapki jupanakax wali phiñasitapxiwa.

Derechos Reservados © Radio San Gabriel 2011 - 2017
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia